Oğuzda cüdo üzrə region yarışlarına start verilib

Azərbaycan Cüdo Federasiyasının qarşısında duran prioritet məsələlərdən biri də regionlarda bu idman növünün kütləviliyi və inkişaf etdirilməsidir.

Olimpiya.az xəbər verir ki, Federasiyanın dəstəyi ilə bir neçə bölgədə cüdo zalları yaradılıb, standartlara tam cavab verən tatamilər düzülüb, yeniyetmələrə cüdoqilər verilib, yerli mütəxəssislər və məşqçilər işlə təmin olunublar.
Perspektivli yeniyetmə cüdoçuları müəyyənləşdirmək üçün hər il olduğu kimi, bu il də region yarışları keçirilir. Azərbaycan Cüdo Federasiyası tərəfindən təşkil edilən bu yarışlarda əsas məqsəd həm regionlarda cüdonun inkişafı, həm də cüdomuzun gələcəyi üçün yeni parlaq nəsil yetişdirməkdir. Bu dəfə region birinciliyi Oğuzda təşkil olunub. Şimal zonasını təmsil edən Ağsu, İsmayıllı, Qəbələ, Oğuz, Qobustan və Şamaxı cüdoçuları medallar uğrunda mübarizə aparıblar.

Yarışlar Azərbaycan Cüdo Federasiyasının tərəfindən bölgələrə ezam edilmiş federasiya rəsmiləri və idman mütəxəssisləriindən ibarət peşəkar heyətlə keçirlir. Qaliblərə Azərbaycan Cüdo Federasiyasının diplomları, medallar və hədiyyələr təqdim edilib. Bölgələrdə uğur qazanan ən perespektivli yeniyetmə cüdoçular ölkə çempionatında mübarizə aparacaqlar.

Qeyd edək ki, Oğuzda keçirilən bölgə yarışı noyabrın 5-də diğər yaş qrupları üzrə davam etdiriləcək.